La 7-an de oktobro, Hamas lanĉis senprecedencan atakon kontraŭ suda Israelo, farante multajn militkrimojn kontraŭ israelaj civiluloj. Kiel reago Israelo lanĉis grandskalan armean operacion en la Gaza Sektoro. La nombro de viktimoj pliiĝas po horo. Centoj da mortoj, inkluzive de multaj civilaj viktimoj, jam estis raportitaj en Israelo kaj Gazao. La organizoj subskribantaj ĉi tiun gazetaran komunikon sendube kondamnas la militkrimojn kontraŭ kaj israelaj kaj palestinaj civiluloj. Ili alvokas Belgion kaj EU prioritati la interkonsenton de tuja militpaŭzo, protekton de civiluloj kaj respekton de internacia juro. Ili memorigas ankaŭ, ke nur solvoj al la strukturaj kaŭzoj povas definitive ĉesigi la perforton.
Sabaton, la 7-an de oktobro, Hamas lanĉis atakon kun senprecedenca perforto kontraŭ suda Israelo. Armitaj Hamas-komandoj penetris Israelon, vundante kaj mortigante centojn da israelaj civiluloj. Israelo tiam lanĉis armean operacion kontraŭ Hamas-pozicioj en la Gaza Sektoro. La sendistingaj israelaj bombadoj jam postulis la vivojn de multaj palestinaj civiluloj
Internacia juro kiel kompaso
Konfronte al ĉi tiu eskalado de perforto, la kompaso de Belgio kaj EU devas resti la internacia juro. Mortigi, kidnapi kaj ostaĝigi civilulojn estas militkrimoj. La samo koncernas la arbitrajn bombardadojn. Malobservoj de internacia humanitara juro estas neakcepteblaj, sendepende de kiuj estas la krimintoj. Pro la systema rifuzo devigi ĉiujn partiojn respekti internacian juron kaj pro permeso de senpunaj malobservoj, la internacia komunumo gravege respondecas pri la malesperiga situacio, en kiu ni troviĝas hodiaŭ.
Ankaŭ gravas klarigi la kuntekston, en kiu okazas ĉi tiu eskalado. Israelo trudas blokadon al la Gaza Zono de pli ol dekses jaroj. Pli ol 2 milionoj da palestinanoj sekve estas kolektive punitaj kaj israelaj bombardadoj estas kutimaj, sen ke la loĝantaro povu fuĝi. Pro severaj limigoj al la libera movado de homoj kaj varoj, 97% de la fluakvo de Gazao estas netaŭga por konsumo, senlaboreco estas 47% kaj 80% de la loĝantaro dependas de internacia helpo. Cetere, la blokado de Gazao estas nur unu aspekto de la israela okupado kaj la rasapartisma reĝimo, kiun Israelo trudas al la tuta palestina popolo.
Rompi la ciklon de perforto
Ni eksplicite kondamnas la atakojn de Hamas kontraŭ israelaj civiluloj, kiuj estas militkrimoj kaj devas esti kondamnitaj kiel tia. Ni same energie kondamnas la arbitrajn atakojn de la militistaro kontraŭ la palestina civila loĝantaro en Gazao. Ĉiuj politikaj kaj diplomatiaj kanaloj devas esti aktivigitaj por ĉesigi ĉi tiun perforton. Josep Borell, la Alta Reprezentanto de EU, kunvokis specialan kunvenon kun la 27 eŭropaj ministroj pri eksteraj aferoj marde la 10-an de oktobro. Ni alvokas Belgion kaj Eŭropan Union doni rapidan prioritaton al konkludo de tuja militpaŭzo, protekton de la palestina kaj israela civila loĝantaro kaj respekton de internacia juro. Ni kondamnas la decidon de la Eŭropa Komisiono redukti la helpon al la palestinanoj, kiu nur subfosos la Palestinan Aŭtoritaton kaj UNRWA (la agentejo de UN por palestinaj rifuĝintoj) kaj kolektive punos la tutan palestinan loĝantaron en la momento, kiam ĝi plej bezonas tiun ĉi helpon. Ni ankaŭ alvokas Belgion kaj Eŭropan Union agi rapide por ĉesigi la ripetiĝantajn ciklojn de perforto en la regiono, traktante iliajn strukturajn kaŭzojn, nome la longdaŭra okupado de palestina teritorio kaj la multnombraj malobservoj de la internacia juro kiuj el tio rezultas.
La alvokon iniciatis:
• 11.11.11
• Asocio Belgo-Palestina
• Belgaj Akademianoj kaj Artistoj por Palestino
• Broederlijk Delen
• CNCD-11.11.11
• Entraide et Fraternité
• Intal
• La Centrale Générale-FGTB
• Mouvement Ouvrier Chrétien
• Oxfam
• Palestina Solidareco
• Pax Christi Flandrio
• Solsoc
• Soutien Belge Overseas
• Union des Progressistes Juifs de Belgique
• Viva Salud
• Vrede vzw